“Səbail” PFK “Fakel”lə qarşılaşıb

“Səbail” PFK bu gün qış təlim-məşq toplanışı çərçivəsində son yoxlama oyununu keçirib. Komandamız Rusiya Premyer Liqa təmsilçisi “Fakel”lə üz-üzə gəlib. Rəqib penalti zərbəsindən vurduğu qolla minimal hesablı qələbə qazanıb. Xatırladaq ki, Şahin Diniyevin yetirmələri Türkiyədə keçirdiyi ilk yoxlama oyununda Rumıniya Superliqa təmsilçisi “Universitatea Cluj”la heç-heçə etmişdi. “Səbail” PFK sabah Antalyada son məşqini keçirəcək və yanvarın 17-i səhər saatlarında Bakıya yola düşəcək. Görüş başa çatdıqdan sonra komandamızın baş məşqçisi Şahin Diniyev oyun haqqında fikirlərini klubun rəsmi saytına bildirib: “Bu gün hazırlıq mərhələsi çərçivəsində dinamik futbol nümayiş etdirən Rusiya klubu “Fakel”ə qarşı son yoxlama oyunumuzu keçirdik. Məğlub olmağımıza baxmayaraq, düşünürəm ki bizim üçün xeyirli qarşılaşma oldu. Futbolçularımdan razıyam, 90 dəqiqə ərzində komanda verdiyim tapşırıqları düzgün yerinə yetirdi. Funksional fiziki hazırlığımızın pik nöqtəsi dövründə komandada ümumi işin nəticəsini görmək məni sevindirdi. Əfsuslar olsun ki, zədəli futbolçularımızın çoxluğu daha böyük rotasiyaya getməyimizə səbəb oldu. Bu məqamda belə bütün futbolçuların işə yanaşması, eyni səviyyədə özünü göstərməsi məni sevindirdi. Sabah Antalyada son məşqimizi keçirib yanvarın 17-i Bakıya yola düşəcəyik”.

Yoxalama oyunu / Antalya

“Səbail” - “Fakel” (Rusiya) 0:1