Hər oyunda 1 ithaf – Hacı İsmayılov

“Səbail” PFK Misli Premyer Liqasının 2023/2024-cü illər mövsümün başlanması ilə yeni layihəyə start verməsi barədə məlumat vermişdik. Cari mövsümdə klubumuzun keçirdiyi hər ev oyunu ölkəmizin tarixi, görkəmli şəxsiyyətləri, mədəniyyət və incəsənəti ilə bağlı əlamətdar günlərə, həmçinin beynəlxalq səviyyədə qeyd olunan müəyyən tədbirlərə həsr olunmaqdadır. Beləliklə, bu gün “ASCO Arena”da keçiriləcək “Səbail” - “Zirə” oyunu Azərbaycan Respublikasının xalq artisti, görkəmli aktyor, Azərbaycan incəsənətində misilsiz xidmətləri olan Hacı İsmayılovun 80 illik yubileyinə həsr olunacaq. Hacı Məcid oğlu İsmayılov 22 yanvar 1944-cü ildə Bakı şəhərində anadan olub. O, 1963-cü ildə Mirzağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub. Aktyor «Azərbaycanfilm» kinostudiyasında ilk dəfə «Ad günü» filimində Mustafa rolunda çəkilib, bu rolla böyük uğur qazanıb və Respublikanın Dövlət mükafatı lauratı adına layiq görülüb (1980). Bundan sonra «Bağlı qapı arxasında» (Alik), «Yol əhvalatı» (Mürşüd), «Ölsəm, bağışla» (Tağı), «Fəryad» (Rövşən), «Bəyin oğurlanması» (Tağı), «Özgə həyat» (Qasımov), «Həm ticarət, həm ziyarət» (Mustafa müəllim) filmlərində müxtəlif xarakterli rollara çəkilib. Azərbaycan Dövlət Televiziyasında hazırlanmış çoxlu əsərlərdə iştirak edib. Onların arasında V.Səmədoğlunun «Yaşıl eynəkli adam» (Qafar), M.Süleymanlının «Fatehlərin divanı» (Qazi), Ü.Hacıbəyovun «Ordan-burdan» (Qoçu Gülbala), İ.Əfəndiyevin «Atayevlər ailəsində» (Xuruşid), A.Məmmədovun «Kişilər» (Səməndər), A.Babayevin «Nekroloq» (Fərəc) və s. tamaşalarda dramatik və tipik obrazlar yaratmışdır. Hacı İsmayılov 1989-cu ildə Əməkdar artist, 2000-ci ildə Xalq artisti fəxri adına layiq görülüb. 2019-cu ildə “Şöhrət” ordeni ilə təltif olunana sənətkarımız president təqaütçüsüdür. Biz də “Səbail” PFK olaraq, Hacı müəllimə hər zaman gümrah, sağlam teatrımızın səhnəsində olmağı arzu edirik.